Kelawan muji marang Pengeran
Kang paring rohmat lan kenikmatan
Rino wengine tanpo pitungan
Duh bolo konco prio wanito
Ojo mung ngaji syare’at bloko
Gur pinter dongeng nulis lan moco
Tembeh mburine bakal sangsoro
Akeh kang apal Qur’an Hadist-e
Seneng ngafirke marang liyane
Kafire dewe gak digatekke
Yen isih kotor ati akale
Gampang kabujuk nafsu angkoro
Ing pepaese gebyare ndunyo
Iri lan meri sugihe tonggo
Mulo atine peteng lan nisto
Ayo sedulur joh nglalekake
Wajibe ngaji sak pranatane
Nggo ngandelake iman tauhid-e
Baguse sangu mulyo matine
Kang aran sholeh bagus atine
Kerono mapan sari ngilmune
Laku toreqot lan ma’rifate
Ugo hakekot manjing rasane
Al-Qur’an qodim wahyu minulyo
Tanpo tinulis iso diwoco
Iku wejangan guru waskito
Den tancepake ing njero dodo
Kumantil ati lan pikiran
Mrasuk ing badan kabeh jerohan
Mukjizat Rosul dadi pedoman
Minongko dalan manjinge iman
Kelawan Alloh Kang Moho Suci
Kudu rangkulan rino lan wengi
Ditirakati diriyadho-i
Dzikir lan sulur jo nganti lali
Uripe ayem rumongso aman
Dununge roso tondo yen iman
Sabar narimo najan pas-pasan
Kabeh tinakdir saking Pengeran
Kelwan konco dulur lan tonggo
Kang podo rukun ojo gok sio
Iku sunahe Rosul kang mulyo
Nabi Muhammad panutan kito
Ayo nglakoni sakabehane
Alloh kang bakal ngangkat drajate
Senajan asor toto dhohire
Ananging mulyo maqom drajate
Lamun palasto ing pungkasane
Ora kesasar roh lan sukmane
Den gadang Alloh suargo manggone
Utuh mayite ugo ulese
Tidak ada komentar:
Posting Komentar